Recugnuschentscha
Sch'als geniturs d'ün uffant nu sun maridats, sto la relaziun tranter il bap biologic e seis uffant gnir motivada tras üna recugnuschentscha da la paternità. Nus As racumandain da declerar la recugnuschentscha da la paternità avant la naschentscha pro l'uffizi da stadi civil respunsabel.
Premissas per üna recugnuschentscha
• Be il bap biologic po recugnuoscher seis uffant. (Per uffants na biologics exista la pussibiltà d'üna adopziun.)
• Scha la mamma da l'uffant es maridada, vala – davo la naschentscha – giuridicamaing sco prüm il consort sco bap da l'uffant. La recugnuschentscha tras il bap biologic po gnir fatta pür cur cha la paternità dal consort es gnüda abolida dal derschader cumpetent.
• Ün hom chi voul recugnuoscher üna paternità sto esser maioren ed abel da giüdichar. Uschglö douvra el il consentimaint da sia represchentanza legala.
Effect d'üna recugnuschentscha
La recugnuschentscha da paternità nu po gnir revocada. Ella motivescha la parentella giuridica tanter il bap biologic e l'uffant. L'uffant recugnuoschü ha il dret d'ierta vers seis bap ed ha il dret da mantegnimaint.
L'uffant minoren d'üna mamma estra chi'd es nat davo ils 1. da schner 2006 e chi'd es gnü recugnuoschü d'ün bap svizzer, acquista il dret da burgais chantunal e cumünal renconuschand quist dret.