Recugnuschentscha
Scha'ls geniturs d'ün uffant nu sun maridats, sto la relaziun tanter il bap biologic e seis uffant gnir motivada tras üna recugnuschentscha da la paternità. Nus As racumandain da declerar la recugnuschentscha da la paternità avant la naschentscha pro l'uffizi da stadi civil respunsabel.
Premissas per üna recugnuschentscha
- Be il bap biologic po recugnuoscher seis uffant. (Per uffants na biologics exista la pussibiltà d'üna adopziun.)
- Scha la mamma da l'uffant es maridada, vala – davo la naschentscha – giuridicamaing sco prüm il consort sco bap da l'uffant. La recugnuschentscha tras il bap biologic po gnir fatta pür cur cha la paternità dal consort es gnüda abolida dal derschader cumpetent.
- Ün hom chi voul recugnuoscher üna paternità sto esser maioren ed abel da güdichar. Uschigliö douvra el il consentimaint da sia represchantanza legala.
Effet d'üna recugnuschentscha
La recugnuschentscha da paternità nu po gnir revocada. Ella motivescha la parantella giuridica tanter il bap biologic e l'uffant. L'uffant recugnuschü ha il dret d'ierta vers seis bap ed ha il dret da mantegnimaint.
L'uffant minoren d'üna mamma estra chi'd es nat davo ils 1. da schner 2006 e chi'd es gnü recugnuschü d'ün bap Svizzer, acquista il dret da burgais chantunal e cumünal rencugnuschand quist dret.
Documaints necessaris per la recugnuschentscha
Nus Til/Tilla cusgliain gugent per telefon (+41 81 861 00 08) davart ils documaints necessaris.
Chüra genituoriala cumünabla
Genituors chi nu sun maridats pon far la declaraziun davart la chüra genituoriala cumünaivla a chaschun da la recugnuschentscha da l'uffant tras il bap pro l'uffizi da stadi civil. Scha la declaraziun davart la chüra genituoriala nu vegn fatta insembel cun la recugnuschentscha da l'uffant, po ella gnir fatta plü tard pro l'autorità per la protecziun d'uffants dal lö da domicil.
Nom da famiglia da l'uffant
Scha la chüra genituoriala vegn conclüssa, po l'uffant portar il nom da famiglia dal bap o da la mamma. Sainza üna tala cunvegna survegn l'uffant il nom da nubil da la mamma. Per cha l'uffant possa portar il nom dal bap a partir da la naschentscha, ston la recugnuschentscha da paternità e la cunvegna davart il dret da chüra cumünaivel gnir fattas avant la naschentscha. Scha la recugnuschentscha da paternità ed il dret da chüra cumünaivel vegnan declerads pür davo la naschentscha, po gnir suottascrittas pro l'uffizi da stadi civil infra 1 on üna declaraziun dal nom sül nom da nubil dal bap.
Cuosts
| Recugnuschentscha | Fr. 75.00 |
| Chüra genituoriala cumünabla | Fr. 30.00 |
Termins tenor cunvegna telefonica.