Concept politica d'uffants e da giuvenils
Ils tschinch cumüns da la Regiun EBVM elavuran cun sustegn dal Uffici da sandà dal Grischun ün concept politica d'uffants e da giuvenils. Il concept ed il process correspundent han sco böt principal da guarantir üna politica d’uffants e da giuvenils activa, persistenta e visibla sün nivel cumünal e regiunal e da rinforzar l’attractività da la regiun pella generaziun giuvna e per famiglias. Il process focussescha l’access a sportas cumplementaras a la chüra da la famiglia e scoula per uffants a partir da la gravitanza e naschentscha fin a’l principi da la vita sco creschüts (0-25 ons).
Il process vegn realisà da maniera partecipativa cull’integraziun da protadras da prestaziun regiunalas e da perits, chi elavuran i’l rom da gruppas da progets (promoziun d'uffants pitschens / temp da scoula / giuventüna+) böts e activitats cumünaivlas. La manadra operativa da proget coordinescha las gruppas da progets ed il process general. Sün nivel strategic vegn il proget accumpognà d’üna gruppa da gestiun cun rapreschantants da minch cumün (incumbenzats per la promuziun da sandà e prevenziun sün nivel da cumün e/o da scoula) e dal svilup regiunal. Il chantun Grischun sustegna il proget cun üna contribuziun financiala dal Uffici da sandà dal Grischun sco eir cull’expertisa d’üna perita da jugend.gr. In reguard metodic as orientescha il proget davo «Primokiz» ed il Leitfaden zur Entwicklung der kommunalen Kinder- und Jugendpolitik sco basas provadas in tuot la Svizra.
Dürant la prüma etappa vegn elavurada fin la prümavaira 2025 ün’analisa da situaziun. Dürant la seguonda etappa segua fin la prümavaira 2026 l’elavuraziun dal concept cun plan da masüras e da realisaziun. Singulas masüras dessan gnüdas iniziadas e realisadas tant sco pussibel fingià dürant il process.
Pel cumanzamaint dal proget ha lö dürant l’utuon 2024 in mincha cumün üna maisa raduonda:
- Samignun, 27 avuost 2024, 20-22h
- Scuol, 2 october 2024, 19-21.30h
- Zernez, 22 october 2024, 19-21.30h (Auditorium SNP)
- Valsot, 28 october 2024, 19-21.30h (Scoula Ramosch)
- Val Müstair, 9 november 2024, 14-17h (Hotel Helvetia, Müstair)
In cas da dumondas o interess per collavuraziun sta Sabrina Gunsch, la manadra dal proget, gugent a disposiziun ad El/Ella (sabrina.gunsch@ebvm.ch)